Page:Ruffhead - The Statutes at Large, 1763.djvu/184

pur ceo qe nous avoms entendu qe len contrefait par de la le bon esterling de mauvais e de faus metal pur plus grant dammage faire a nostre Roiaume avantdit nous avoms ensement ordene qe touz ceux qi esterlings porteront de la outre en meisme le Roiaume ou aillours en nostre poer deivent bailler e baillent meismes ceux esterlings a ditz gardeins des portz ou il arriveront e qe meismes ceux gardeins souz leur seaux e souz les seaux de ceux qi les porteront e par bon tesmoignage des bones gentz de meismes les portz les envoyent tauntost a procheyns assaiours qi assignetz serrount depar nous pur le asay faire de moneye. E deyvent meismes les gardeyns envoier les cors ove les deners sauvement e en curteise manere. E si les assaiours troussent les deners bons e loiaux en pois e en argent e en totes autres choses solonc la veil estandard dEngleterre mayntenaunt desarrestent les cors e leur deliverent les deners qil averont ensuit portetz e si fauses soient troves forfaitz soient e les cors a nostre volunte. Derechef ordene est qe nuls desormes de nostre Roiaume ne de nostre poer ne vende ne lesse laines ne quirs ne peaux ne plum ne estaim forke pur bons e loiaux esterlings ou pur plate de argent assaie e merche a nostre grant chaunge ou en eschaunge de bone de loiale e de suffisant marchaundise e si nul le fait autrement e de ceo soit atteynt par les ditz gardeyns ou par autres de nos ministres qe les choses issint vendues ou lessees nous soient forfaites. Uncore est ordene qe nule bone moneye de argent de nostre coign ne de autri ne nul argent en plate ne en autre manere ne isse ne porte ne soit hors de nostre Roiaume ne hors de nostre poer en les parties de la outre saunz especiale conge de nous sur la peyne desusdite. E a cete chose garder ensemblement ove les autres pointz avantditz devent meismes gardeyns mettre diligence e peine en toutes les bones maneres qil porront. E ceux meismes gardeyns avant qe il receivent la garde avantdite deyvent jurerdevant les viscuntes ou devant leur chefs gardeyns la ou il ne sunt a viscuntes responantz qe il feront e tenderont loiaument e saunz nule lascheste tant com en eux est tut ce qe a cete garde apartient selonqe la forme avandite. E sil facent releis ou desportz a nuly pur doen ou pur favour ou en aucune autre manere e de ceo soient atteynt qil soient en forfaiture de vie e de quant qil ount. Derechef come ordene soit qil y eit table a Dovre e aliours ou nous ordeneroms passages certeyns pur chaunger despens necesseires as alantz e as venantz si avoms ja assigne Johan Bellard Johan Galeys e leur compaignons a tenir table a Dovre de par nous de totes maneres de moneies. E voloms qe il facent iloeques chaunge pur despens necesseires as alauntz la outre e as venaunz de dela par vewe e tesmoignaunce de countrerolleour qe nous y metteroms e qe totes gentz qe venderontde la outre portaunz moneie qe curt en poer le roi de Fraunce portent meisme la moneie a la dite table e illoeques receyvent al aveignaunt de la moneie qe curt en nostre Roiaume. E sil soient trove nule part ailours ove tiele moneie qe meisme la moneie nous soit forfaite e le forfait tourne a la dite table a nostre oeps. Pur quoi nous vous mandoms fermement enjoignantz qe mayntenaunt vewes cetes lettres touz les articles e pointz avantditz facent crier e publier en cites e burghs viles marchaundes portz e touz autres lieux parmy vostre bailie la ou vous verretz qe soit afaire E gardeyns establir e jurer e cete nostre ordenaunce tenir e garder en la forme desusdite sur les peynes en meisme cete forme countenues. Don' a Stebenheth le quintime jour de May lan de nostre regne vint septisme.

^[1]VOUS devez savoir qe la ou relief est done qe illeoqes appent garde & econtre & ceux qi tiegnent en serjauntie Daler ove le Roi en son host qe illeoqes appent garde & relief Mes ceux qi tiegnent en petit serjauntie come de porter escu ou launce en lost le Roi ou decarier la ne gist garde ne relief ne fraunk sokeman durra garde ne relief mes ils doublerount sa ferme apres la mort lour Auncestres selonc ceo qils purrount paier lour Seignur & il neint outre mesure greve.

Ore oiez la nature de garde avoir deux maneres des briefs sont de garde avoir.

Cest assavoir la ou homme tient dun autre un ten. en socage la garde de la terre qest tenu per service de Chivaler appent au chief Seignur & la mariage & doit issint estre marie qele ne soit desparage come la graunt Chartre voet Cap. iii. Garden en socage.Et si est lage & la garde de cel Heire xxi. an La garde del Heire qe tient en socage si la terre ou leritage descend de part sa miere donqes appent au pluis proschein parent de part son piere autre per fee de Haubergh & le tenant se lesse morer donqes poet le chief Seignur sil soit deforce demaundre la garde de la terre & del heire celui & il avera la garde & le mariage.

Lautre est quaunt une homme est feffe dune verge de terre & dun autre de un carve du terre le second Seignur ne poet mie port brief de garde avoir de la terre & del heire qar la garde appent a celui de qi son Auncestre fuist primes feffe la terre la ou il y ad terre en sa main en noun du garde & il nest mye heir donqes purra porter brief a demaundre le Heir sanz sa terre, &c.