Page:Ruffhead - The Statutes at Large, 1763.djvu/110

LE an de grace MCCLXXVIII. e del regne le Rey Edward fiz le Rey Henri sisme a Gloucestre le mois de Aust purveaunt mesme le rei pur le amendement de sun reaume e pur plus plenere exhibicion de dreit si com le profit de office regal demaunde appelez les plus descrez de sun regne ausi bien des greindres cum des meindres. Establi est e concordaument ordeine qe cum mesme le regne en plusurs divers cas ausi bien de fraunchises com de autre choses en les queles avaunt lei failli e a eschuire les tresgress damages e les nient numbrables desheritesuns Les quels icel manere defaute de lei fist a la gent du reaume eit mester de divers supplecions de lei e de noveles purveaunces e les estatuz ordeignemenz e purveaunces suz escrites de tute la gent del regne desoremes fermement seient gardez. Cum Prelatz Cuntes Baruns e autres del regne cleiment aver divers fraunchises a les quels examiner e jugger le Rey a mesmes ceus Prelats Cuntes Baruns e autres aveit done jour purveu est e concordaument graunte qe les avauntditz Prelatz Cuntes Baruns e autres tels manere de fraunchises usent issint qe rien ne lur acresse par usurpacion ou occupaciun ne ren sur le Rei occupent desqe a la procheine venue le Rei par le counte ou a la procheine venue de Justices erraunz a comuns plez en mesme le counte ou desqe le Rei comaunde autre chose sauve le dreit le Rei cum il envodra parler solom ceo qe il est cuntenu en le bref le Rei. E de ceo soient maunde brefs as Viscuntes Baillifs e autres per chescun demaundaunt e seit la forme del bref chaungee solom la diversete dez fraunchises les quels chescun cleime aver. E les Viscuntes par tutes lur baillies ferunt communement crier ceo est asaver en cites en burgs en viles marchaundes e aillours qe tuz ceus qi aucunes fraunchises cleiment aver par les chartres les predecessurs le Rei Reis de Engleterre ou en autre manere seient devaunt le Rei ou devaunt justices en eire a certeins jour e leu a mustrer quel manere de fraunchises il cleiment aver e par quel garaunt. E les viscuntes meimes dunqes ferrunt iloeqes personenment od lur baillifs e lur menistres a certifier le Rei sur les avauntdites fraunchises e autres choses qe celes fraunchises touchent. E ceste criee devaunt le Rei cunteigne garnisement de treis semeines. E mesme la manere ferunt les viscuntes crier en eire de justices. E en mesme la manere serrount il personenment od lur baillifs e lur menistres a certifier les justices de tel manere de fraunchises e de autre choses qe celes fraunchises touchent. E ceste criee conteigne garnisement de quaraunte jours si com la commune somonuse content issi qe si la partie qe cleime aver fraunchise seit devaunt le Rei ne seit pas mis en defaute devaunt les Justices en eire pur ceo qe le Rei de sa grace especiale ad graunte qe il garder la partie de damage quaunt a cel ajornement. E si cele partie seit en plai sur tels manere de fraunchises devatait une peire de Justices avauntdiz mesmes les Justices devaunt les quels la partie est en plai garderount la partie de damage devaunt autres Justices E le Rei devaunt lui mesmes mes qe il sache par les Justices qe la partie fust en plai devaunt eus si com il est avauntdit. E si cels qi tels fraunchises cleiment aver ne viegnent al jour avauntdit dunqes seient les fraunchises en nun de destresse pris en la main le Rei par le viscunte del liu issi qe il tel manere de fraunchises ne usent desqe il viegnent a receivre dreit. E quaunt il veinent par cele destresee lur fraunchises lur seient replevies si il les demaundent les quels replevies respoignent meintenaunt en la forme avauntdite. E si par aventure les parties exceptent qe il ne deivent nent de ceo respundre saunz bref original dunqe si il pusse estre seu qe eus de lur propre fet eient usurpe ou ocupe aucunes fraunchises sur le Rei ou sur ses predecessors dit lur seit qe meintenaunt respoignent saunz bref e pus receivent jugement si com la Curt le Rei agardera. E si il dient outre qe lur auncestre ou lur auncestres de meismes les fraunchises morurent seisis soient oiz e meintenaunt seit la verite enquise e solom ceo aillent les justices avaunt en la besoigne. E si il seit trove qe lur auncestre en morust seisi dunqes eit le Rei bref original de sa chauncelerie en la forme fete de ceo Le Rei maunde saluz au viscunte sommonez par bons somonours un tel qe il seit devaunt nus a teu lieu en nostre procheine venue en cel Cunte ou devaunt nos Justices a primeres assises cum il en celes parties vendrount a mustrer par quel garaunt il cleime aver quitaunce de tonnue pur sei ou ses hommes par tut nostre reaume par continuation apres la mort tel jadis sun predecessour. E eiez les somonurs e ceo bref. E si les parties viegnent al jor respoignent e seit replie e juge. E si il ne viegnent ne se essoignent devaunt le Rei e le Rei demoerge outre en cel Cunte seit comaunde al viscunte qe il les face venir al quart jor al quel jor si il ne viegnent e le Rei demoerge outre en cel Cunte seit fet si com en eire des Justices. E si le Rei departe del cunte seient les parties ajornees a bref jor e eient renables delais jouste les descrecions des justices si cum en actiuns personeles. E les justices en eire facent de ceo en lur eires solom le ordeinement avauntdit e solom ceo qe tel manere de plez deivent estre dedut en eire. De pleintes fetes e a fere des baillifs le Rei e de autri baillifs seit fet solom le ordeinement avaunt fet de ceo e solom les enquestres de ceo avaunt prises E de ceo frunt les Justices en eire solum ceo qe le Rei lour ad enjoint e solum les articles qe le Rei lur ad livere.^[2]