New pease strae/Jenny, Lass, my bonny Bird

JENNY, lass, my bonny bird,
My father’s dead, and a’ that,
And snugly laid aneath the yeard,
An’ i’m his heir, an’ a’ that:

I’m now a laird, an’ a’ that,
I’m now a laird, an' a’ that
I’ve gear an’ lan’ at my comman’,
An’ muckle mair than a’ that.

He left me, wi’ his diein’ breath,
A dwelling-house, an’ a’ that;
Guid byars an’ barns, an’ wabs o’ claith;
A guid peat-stack, an’ a’ that:

A mare, a foal, an’ a’ that,
A mare, a foal, an’ a’ that;
Sax guid milk ky, a ca’f forby;
(illegible text)

​A yard, a meadow, lang braid lees;
Wi’ stacks o’ corn, an’ a’ that:

They’re weel hedg’d roun’ wi’ thorns an’ trees
An’ carts, an’ cars, an’ a’ that:

A plou’ an’ greath, an’ a’ that,
A plou’ an’ greath, an’ a’ that;
Good harrows twa, cocks, hens an’ a’,
A grizle too, an’ a’ that.

I’ve walth o’ claiths for ilka-days,
For Sundays too an a’ that;
I’ve bills an’ ban’s on lairds an’ lan’s,
An’ filler, goud, an’ a’ that;

An muckle mair than a’ that.
An’ muckle mair than a' that:
What want I now, my bonny dow,
But just a wife to a' that?

Now, Jenny dear, my errand here
Is to seek you to a’ that;
My heart’s a’ lowpin’ whan I speer
Gin ye’ll tak me wi’ a’ that?

Mysel’ my gear, an’ a that,
Mysel’, my gear an’ a’ that:
Come, gie’s your loof. to be a proof
That ye’ll tak me wi’ a’ that.

Syne Jenny laid her ⟨nive⟩ in his;
Said she’d tak him wi’ a’ that:
An’ he gaed her a hearty kiss;
An’ dauted her, an’ a’ that:

They set the day an’ a’ that.
They set the day, an’ a' that,
Whan she’d come hame to be his dame,
An’ ha’e a rant wi' a’ that.