Miscellaneous Poems (Marvell)/Ros
Ros.
Cernis ut Eoi descendat Gemmula Roris,
Inque Rosas roseo transfluat orta sinu.
Sollicitâ Flores stant ambitione supini,
Et certant foliis pellicuisse suis.
Illa tamen patriæ lustrans fastigia Sphæræ,
Negligit hospitii limina picta novi.
Inque sui nitido conclusa voluminis orbe,
Exprimit ætherei quâ licet Orbis aquas.
En ut odoratum spernat generosior Ostrum,
Vixque premat casto mollia strata pede.
Suspicit at longis distantem obtutibus Axem,
Inde & languenti lumine pendet amans,
Tristis, & in liquidum mutata dolore dolorem,
Marcet, uti roseis Lachryma fusa Genis.
Ut pavet, & motum tremit irrequieta Cubile,
Et quoties Zephyro fluctuat Aura, fugit.
Qualis inexpertam subeat formido Puellam,
Sicubi nocte redit incomitata domum.
Sic & in horridulas agitatur Gutta procellas,
Dum præ virgineo cuncta pudore timet.
Donec oberrantem Radio clemente vaporet,
Inq; jubar reducem Sol genitale trahat.
Talis, in humano si possit flore videri,
Exul ubi longas Mens agit usq, moras;
Hæc quoque natalis meditans convivia Cœli,
Evertit Calices, purpureosque Thoros.
Fontis stilla sacri, Lucis scintilla perennis,
Non capitur Tyria veste, vapore Sabæ.
Tota sed in proprii secedens luminis Arcem,
Colligit in Gyros se sinuosa breves.
Magnorumque sequens Animo convexa Deorum,
Sydereum parvo fingit in Orbe Globum.
Quam bene in aversæ modulum contracta figuræ
Oppositum Mundo claudit ubiq; latus.
Sed bibit in speculum vadios ornata rotundum;
Et circumfuso splendet aperta Die.
Qua Superos spectat rutilans, obscurior infra;
Cætera dedignans, ardet amore Poli.
Subsilit, hinc agili Poscens discedere motu,
Undique coelesti cincta soluta Viæ.
Totaque in æreos extenditur orbita cursus;
Hinc punctim carpens, mobile stringit iter.
Haud aliter Mensis exundans Manna beatis
Deserto jacuit Stilla gelata solo:
Stilla gelata solo, sed Solibus hausta benignis,
Ad sua quâ cecidit purior Astra redit.
Inque Rosas roseo transfluat orta sinu.
Sollicitâ Flores stant ambitione supini,
Et certant foliis pellicuisse suis.
Illa tamen patriæ lustrans fastigia Sphæræ,
Negligit hospitii limina picta novi.
Inque sui nitido conclusa voluminis orbe,
Exprimit ætherei quâ licet Orbis aquas.
En ut odoratum spernat generosior Ostrum,
Vixque premat casto mollia strata pede.
Suspicit at longis distantem obtutibus Axem,
Inde & languenti lumine pendet amans,
Tristis, & in liquidum mutata dolore dolorem,
Marcet, uti roseis Lachryma fusa Genis.
Ut pavet, & motum tremit irrequieta Cubile,
Et quoties Zephyro fluctuat Aura, fugit.
Qualis inexpertam subeat formido Puellam,
Sicubi nocte redit incomitata domum.
Sic & in horridulas agitatur Gutta procellas,
Dum præ virgineo cuncta pudore timet.
Donec oberrantem Radio clemente vaporet,
Inq; jubar reducem Sol genitale trahat.
Talis, in humano si possit flore videri,
Exul ubi longas Mens agit usq, moras;
Hæc quoque natalis meditans convivia Cœli,
Evertit Calices, purpureosque Thoros.
Fontis stilla sacri, Lucis scintilla perennis,
Non capitur Tyria veste, vapore Sabæ.
Tota sed in proprii secedens luminis Arcem,
Colligit in Gyros se sinuosa breves.
Magnorumque sequens Animo convexa Deorum,
Sydereum parvo fingit in Orbe Globum.
Quam bene in aversæ modulum contracta figuræ
Oppositum Mundo claudit ubiq; latus.
Sed bibit in speculum vadios ornata rotundum;
Et circumfuso splendet aperta Die.
Qua Superos spectat rutilans, obscurior infra;
Cætera dedignans, ardet amore Poli.
Subsilit, hinc agili Poscens discedere motu,
Undique coelesti cincta soluta Viæ.
Totaque in æreos extenditur orbita cursus;
Hinc punctim carpens, mobile stringit iter.
Haud aliter Mensis exundans Manna beatis
Deserto jacuit Stilla gelata solo:
Stilla gelata solo, sed Solibus hausta benignis,
Ad sua quâ cecidit purior Astra redit.