Fugitive Poetry. 1600–1878/Patie's Wedding

Patie's Wedding.

As Patie cam' up frae the glen,
Driving his wedders before him,
He met bonnie Meg ganging hame—
Her beauty was like for to smoore him.
"O Maggie, lass, dinna ye ken
That you and I's gaun to be married?
I had rather had broken my leg,
Before sic a bargain miscarried."

"O Patie, lad, wha tauld ye that?
I trow o' news they've been scanty:
I'm nae to be married the year,
Though I should be courted by twenty!"
"Now Maggie, lass, what gars ye taunt?
Is't 'cause that I ha'ena a mailen?
The lad that has gear needna want
For neither a half nor a hale ane.

"My dad has a gude grey mare,
And yours has twa cows and a filly;
And that will be plenty o' gear;
Sae Maggie, be na sae ill-willy."
"Weel, Patie, lad, I dinna ken;
But first ye maun spier at my daddie;
You're quite as weel born as Ben,
And I canna say but I'm ready."

"We ha'e walth o' yarn in clews,
To mak' me a coat and a jimpey,
And plaidin' eneuch to be trews—
Gif I get ye, I shanna scrimp ye!
Now fair fa' ye, my bonnie Meg!
I'se e'en let a smackie fa' on ye:
May my neck be as lang as my leg,
If I be an ill husband unto ye!

"Sae gang your ways hame e'en now;
Mak' ready gin this day fifteen days,
And tell your father frae me,
I'll be his gude-son in great kindness."
Maggie's as blythe as a wran,
Bodin' the blast o' ill weather;
And a' the gaite singin' she ran,
To tell the news to her father.

But aye the auld man cried out,
"He'll no be o' that mind on Sunday."
"There's nae fear o' that," quo' Meg,
"For I gat a kiss on the bounty."
"And what was the matter o' that?
It was naething out o' his pocket,
I wish the news were true,
And we had him fairly bookit."

A very wee while after that,
Wha cam' to our biggin but Patie?
Dressed up in a braw new coat,
And anow but he thocht himsel' pretty!
His bonnet was little frae new,
And in it a loop and a slittie,
To draw in a ribbon sae blue,
To bab at the neck o' his coatie.

Then Patie cam' in wi' a stend;
Cried, "Peace be under the biggin!"
"You're welcome," quo' William, "Come ben,
Or I wish it may rive frae the riggin'!
Now draw in your seat, and sit down,
And tell's a' your news in a hurry;
And haste ye, Meg, and be dune,
And hing on the pan wi' the berry."

Quoth Patie, "My news is na thing;
Yestreen I was wi' his honour;
Pve ta'en three rigs o' braw land,
And bound myself under an honour:
And, now, my errand to you,
Is for Maggie to help me to labour;
But I'm feared we'll need your best cow,
Because that our haddin's but sober."

Quoth William, "To harl ye through,
I'll be at the cost o' the bridal;
I'se cut the craig o' the ewe,
That had amaist dee'd o' the side-ill;
And that'll be plenty o' broe,
Sae lang as our well is na reested,
To a' the neebors and you;
Sae I think we'll be nae that ill-feasted."

Quoth Patie, "O that'll do weel,
And I'll gi'e your brose i' the mornin',
O' kail that was made yestreen,
Por I like them best i' the forenoon."
Sae Tam, the piper, did play;
And ilka ane danced that was willin';
And a' the lave they rankit through;
And they held the wee stoupie aye fillin'.

The auld wives sat and they chewed;
And when that the carles grew happy,
They danced as weel as they dowed,
Wi' a crack o' their thooms and a happie.
The lad that wore the white baud,
I think they ca'd him Jamie Mather,
He took the bride by the hand,
And cried to play up Maggie Lauder.