Bruce's Address (Glasgow)/Tam Glen

For other versions of this work, see Tam Glen (Burns).

TAM GLEN.

My heart is a breaking, dear Tittie,
Some counsel unto me come lea';
To anger them a' is a pity,—
But what will I do wi' Tam Glen?
I'm thinking, wi' sic a braw fallow,
In poortith I might mak a sen';
What care I in riches to wallow,
If I maunna marry Tam Glen.

There's Lowrie the laird Drummelier.
Gude day to ye, brute! he comes ben;
He brags an' he blaws o' his siller,
But whan will he dance like Tam Glen.
My minnie does constantly deave me,
And bids me beware o' young men;
They flatter, she says, to deceive me,
But wha can think sae o' Tam Glen.

My daddie says, gin I'll forsake him,
He'll gie me gude hunder marks ten,
But if it's ordained I maun tak him,
O wha will I get but Tam Glen?
Yestreen at the valentines dealin',
My heart to my mou gied a sten;
For thrice I drew ane without failin',
And thrice it was written Tam Glen.

The last Hallowe'en I was waukin
My drookit sark sleeve; as ye ken;
His likeness cam up the house staukin,
In the very grey breeks o' Tam Glen.
Come counsel, dear tittie, dont tarry,
I'll gie' ye my bonny black hen,
Gif ye will advise me to marry
The lad I lo'e dearly, Tam Glen.